വാഷിംഗ്ടൺ: ലോകരാജ്യങ്ങളെ കടുത്ത ആശങ്കയിലാഴ്ത്തിക്കൊണ്ട് ഹോർമുസ് കടലിടുക്കിൽ നാവിക ഉപരോധത്തിന് അമേരിക്കൻ പ്രസിഡന്റ് ഡൊണാൾഡ് ട്രംപിന്റെ ആഹ്വാനം. ഇറാന് ടോൾ നൽകുന്ന കപ്പലുകൾ പിടിച്ചെടുക്കുമെന്ന ട്രംപിന്റെ ഏകപക്ഷീയമായ പ്രഖ്യാപനം അന്താരാഷ്ട്ര കപ്പൽ ഗതാഗതത്തെയും എണ്ണ വിപണിയെയും തകിടം മറിക്കുമെന്ന ഭീതി പരത്തിയിരിക്കുകയാണ്. ഇന്ത്യയടക്കമുള്ള ഏഷ്യൻ രാജ്യങ്ങളിലേക്കുള്ള ഇന്ധന ലഭ്യതയെ ഈ നീക്കം നേരിട്ട് ബാധിക്കുമെന്നാണ് വിലയിരുത്തപ്പെടുന്നത്.
പാകിസ്ഥാനിൽ വെച്ച് നടന്ന നയതന്ത്ര ചർച്ചകൾ ഫലം കാണാതെ പിരിഞ്ഞതാണ് മേഖലയിലെ സംഘർഷം ഇത്രമേൽ വഷളാക്കിയത്. അമേരിക്കൻ വൈസ് പ്രസിഡന്റ് ജെ.ഡി. വാൻസിന്റെ നേതൃത്വത്തിൽ നടന്ന ചർച്ചകളിൽ ആണവ വിഷയത്തിൽ ഇറാൻ കടുത്ത നിലപാട് സ്വീകരിച്ചതോടെ സമാധാന ശ്രമങ്ങൾ പാളി. ചർച്ചകൾ പരാജയപ്പെട്ടതിന് തൊട്ടുപിന്നാലെയാണ് ഇറാനെ സാമ്പത്തികമായി ശ്വാസം മുട്ടിക്കാൻ കപ്പൽ ഗതാഗതം തടയുന്ന കടുത്ത നടപടികളിലേക്ക് ട്രംപ് നീങ്ങിയത്.
ഇറാൻ നിയമവിരുദ്ധമായി ടോൾ പിരിക്കുന്നു എന്നാരോപിച്ചാണ് അമേരിക്കൻ നാവികസേന ഹോർമുസ് കടലിടുക്കിലേക്ക് നീങ്ങുന്നത്. കടലിടുക്കിലൂടെയുള്ള സമാധാനപരമായ ഗതാഗതത്തിന് ഇറാൻ തടസ്സം നിൽക്കുകയാണെന്നും ഇത് തടയാൻ മൈനുകൾ നശിപ്പിക്കുന്നത് അടക്കമുള്ള നടപടികൾ സ്വീകരിക്കുമെന്നും ട്രംപ് വ്യക്തമാക്കി. എന്നാൽ, യുഎസിന്റെ ഈ പ്രകോപനപരമായ നീക്കം മധ്യേഷ്യയിൽ മറ്റൊരു വലിയ യുദ്ധത്തിന് വഴിമാറിടുമോ എന്ന ഭയത്തിലാണ് ലോകം. ചരക്ക് നീക്കം തടസ്സപ്പെടുന്നത് ആഗോള തലത്തിൽ വിലക്കയറ്റത്തിനും സാമ്പത്തിക മാന്ദ്യത്തിനും കാരണമാകുമെന്ന് സാമ്പത്തിക വിദഗ്ധർ മുന്നറിയിപ്പ് നൽകുന്നു.
