അത്ഭുതപ്പെടുത്താൻ ‘ഇറ്റ്സ് എ മെഡിക്കൽ മിറക്കിൾ’; അഡ്വാൻസ് ബുക്കിംഗ് തുടങ്ങി, റിലീസ് നാളെ

മലയാള സിനിമാപ്രേമികൾ ഏറെ ആകാംക്ഷയോടെ കാത്തിരിക്കുന്ന പുതിയ ചിത്രമായ ‘ഇറ്റ്സ് എ മെഡിക്കൽ മിറക്കിളി’ന്റെ അഡ്വാൻസ് ബുക്കിംഗ് ഔദ്യോഗികമായി ആരംഭിച്ചു. വിവിധ ടിക്കറ്റ് ബുക്കിംഗ് പ്ലാറ്റ്‌ഫോമുകൾ വഴി നിലവിൽ പ്രേക്ഷകർക്ക് ടിക്കറ്റുകൾ സ്വന്തമാക്കാവുന്നതാണ്. നാളെ തിയേറ്ററുകളിൽ എത്തുന്ന ചിത്രം ഇതിനോടകം തന്നെ സോഷ്യൽ മീഡിയയിൽ വലിയ ചർച്ചയായിക്കഴിഞ്ഞിട്ടുണ്ട്.

നവാഗതനായ ശ്യാമിൻ ഗിരീഷ് സംവിധാനം ചെയ്യുന്ന ഈ ചിത്രം തിയേറ്ററുകളിൽ എത്തുന്നതിന് മുമ്പ് തന്നെ വലിയ ഹൈപ്പ് ഉണ്ടാക്കിയിട്ടുണ്ട്. സംഗീത് പ്രതാപും ഷറഫുദ്ദീനും കേന്ദ്ര കഥാപാത്രങ്ങളായി എത്തുന്ന ചിത്രത്തിൽ അഖില ഭാർഗവനാണ് നായികാ വേഷം ചെയ്യുന്നത്. കോമയിൽ നിന്ന് അപ്രതീക്ഷിതമായി ഉണർന്നെഴുന്നേൽക്കുന്ന സംഗീത് പ്രതാപിന്റെ കഥാപാത്രത്തിന് ലഭിക്കുന്ന അസാധാരണമായ കേൾവിശക്തിയാണ് ചിത്രത്തിന്റെ പ്രധാന പ്രമേയം. ഈ പ്രത്യേക കഴിവിന് പിന്നിലെ കൗതുകവും അത് നായകന്റെ ജീവിതത്തിലുണ്ടാക്കുന്ന രസകരമായ സംഭവവികാസങ്ങളുമാണ് ചിത്രം പ്രേക്ഷകർക്ക് മുന്നിൽ അവതരിപ്പിക്കുന്നത്.

ചിത്രത്തിന് സെൻസർ ബോർഡിന്റെ U/A 16+ സർട്ടിഫിക്കറ്റാണ് ലഭിച്ചിരിക്കുന്നത്. ശബ്ദത്തിന് ഏറെ പ്രാധാന്യമുള്ള പ്രമേയമായതിനാൽ സൗണ്ട് ഡിസൈനിനും സൗണ്ട് മിക്സിംഗിനും സിനിമയിൽ പ്രത്യേക മുൻഗണന നൽകിയിട്ടുണ്ട്. കോട്ടയം നസീർ, ആനന്ദ് മന്മഥൻ, കിരൺ പീതാംബരൻ, പാർവ്വതി ആർ കൃഷ്ണ തുടങ്ങി വലിയൊരു താരനിര തന്നെ ചിത്രത്തിൽ അണിനിരക്കുന്നുണ്ട്. നടി നിലീൻ സാന്ദ്രയാണ് ചിത്രത്തിന്റെ കഥയും തിരക്കഥയും സംഭാഷണവും ഒരുക്കിയിരിക്കുന്നത്.

ഡോക്ടർ പോൾസ് എന്റർടൈൻമെന്റ്, ഡ്രീം ബിഗ് ഫിലിംസ് എന്നിവയുടെ ബാനറിൽ ഡോക്ടർ പോൾ വർഗീസും സുജിത് ജെ നായരും ചേർന്നാണ് ചിത്രം നിർമ്മിച്ചിരിക്കുന്നത്. മുജീബ് മജീദ് സംഗീതം ഒരുക്കിയ ചിത്രത്തിന്റെ ഓഡിയോ അവകാശം തിങ്ക് മ്യൂസിക് സ്വന്തമാക്കിയപ്പോൾ, ഓവർസീസ് വിതരണം ദി പ്ലോട്ട് പിക്ചേഴ്സും കേരളത്തിലെ വിതരണം ഡ്രീം ബിഗ് ഫിലിംസുമാണ് നിർവഹിക്കുന്നത്. അഖിൽ സേവ്യർ ക്യാമറയും രാകേഷ് ചെറുമഠം എഡിറ്റിംഗും നിർവഹിച്ചിരിക്കുന്ന ചിത്രം തിയേറ്ററുകളിൽ ഒരു ദൃശ്യവിരുന്ന് തന്നെയായിരിക്കുമെന്നാണ് അണിയറപ്രവർത്തകർ നൽകുന്ന ഉറപ്പ്.