പുതിയ രൂപത്തിലും ഭാവത്തിലുമായി ഹോണ്ടയുടെ ജനപ്രിയ എസ്‌യുവിയായ എലിവേറ്റ് ഫെയ്‌സ്‌ലിഫ്റ്റ് വിപണിയിലെത്താൻ തയ്യാറെടുക്കുന്നു. വാഹനത്തിന്റെ ഔദ്യോഗിക ബുക്കിങ് രാജ്യത്തുടനീളം ഇതിനോടകം ആരംഭിച്ചു കഴിഞ്ഞു. 21,000 രൂപയാണ് ടോക്കൺ തുകയായി നൽകേണ്ടത്. ഒക്ടോബർ 6ന് വാഹനം ഔദ്യോഗികമായി പുറത്തിറങ്ങും. ലോഞ്ചിന് മുന്നോടിയായി ഹോണ്ട കാർസ് ഇന്ത്യ പുറത്തുവിട്ട ടീസർ വീഡിയോ വാഹന പ്രേമികൾക്കിടയിൽ വലിയ ചർച്ചയായിട്ടുണ്ട്.
ആകർഷകമായ ബാഹ്യരൂപവും പുതിയ ഗ്രില്ലും
പുതിയ എലിവേറ്റിന്റെ പുറംഭാഗത്ത് ശ്രദ്ധേയമായ ചില ഡിസൈൻ മാറ്റങ്ങൾ വരുത്തിയിട്ടുണ്ട്. പുനർരൂപകൽപ്പന ചെയ്ത ഹെക്സഗണൽ ഡിസൈൻ ഘടങ്ങളോടുകൂടിയ തിളക്കമുള്ള ഗ്രില്ലാണ് ഇതിന്റെ പ്രധാന ആകർഷണം. ഹോണ്ട സിറ്റിയിൽ നിന്ന് പ്രചോദനം ഉൾക്കൊണ്ടുള്ള സെഗ്മെന്റഡ് എൽഇഡി ഡിആർഎല്ലുകളും വാഹനത്തിൽ ഉൾപ്പെടുത്തിയിട്ടുണ്ട്. ഹോണ്ടയുടെ ലോഗോയുടെ സ്ഥാനത്തിലും ചെറിയ മാറ്റങ്ങൾ വരുത്തിയിട്ടുണ്ട്. എന്നാൽ ഹെഡ്‌ലാമ്പ്, ഫോഗ് ലാമ്പ് യൂണിറ്റുകളിൽ വലിയ മാറ്റങ്ങളൊന്നും വരുത്തിയിട്ടില്ല. നിലവിലെ മോഡലിലുള്ള ലെയ്ൻവാച്ച് ക്യാമറ സംവിധാനം പുതിയ പതിപ്പിലും തുടരുന്നതാണ്.
പ്രീമിയം അനുഭൂതി പകരുന്ന അകത്തളം
വാഹനത്തിന്റെ അകത്തളത്തിലും ഒട്ടനവധി മാറ്റങ്ങൾ വരുത്തിയിട്ടുണ്ട്. പുതുക്കിയ ഡാഷ്‌ബോർഡിൽ ആംബർ നിറത്തിലുള്ള ആംബിയന്റ് ലൈറ്റിങ് സ്ട്രിപ്പുകൾ നൽകിയിരിക്കുന്നത് ക്യാബിന് കൂടുതൽ ഭംഗി നൽകുന്നു. കൂടാതെ, വെള്ള നിറത്തിലുള്ള ലെതറെറ്റ് പാഡിങ്ങും സ്റ്റിച്ചിങ്ങും ഇന്റീരിയറിന് കൂടുതൽ പ്രീമിയം ലുക്ക് സമ്മാനിക്കുന്നുണ്ട്. ഡ്യുവൽ സോൺ ക്ലൈമറ്റ് കൺട്രോൾ, പനോരമിക് സൺറൂഫ്, വെന്റിലേറ്റഡ് ഫ്രണ്ട് സീറ്റുകൾ, 10.25 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം, വയർലെസ് ഫോൺ ചാർജർ തുടങ്ങിയ മികച്ച ഫീച്ചറുകളെല്ലാം പുതിയ മോഡലിലും നിലനിർത്തിയിട്ടുണ്ട്. 6 സ്പീക്കർ സൗണ്ട് സിസ്റ്റം, 7.0 ഇഞ്ച് ടിഎഫ്ടി ഡിസ്‌‌പ്ലേയോടുകൂടിയ സെമി അനലോഗ് ഇൻസ്ട്രുമെന്റ് ക്ലസ്റ്റർ, ഓട്ടോ ഡിമ്മിങ് ഐആർവിഎം, ഹോണ്ട സെൻസിങ് എഡിഎഎസ് സുരക്ഷാ സംവിധാനങ്ങൾ എന്നിവയും ഇതിൽ ലഭ്യമാണ്.
എഞ്ചിനിൽ മാറ്റങ്ങളില്ലാതെ കരുത്ത് തുടരുന്നു
വാഹനത്തിന്റെ മെക്കാനിക്കൽ വശങ്ങളിൽ വലിയ മാറ്റങ്ങൾ വരുത്തിയിട്ടില്ല. നിലവിലുള്ള 1.5 ലിറ്റർ, 4 സിലിണ്ടർ നാച്ചുറലി ആസ്പിറേറ്റഡ് പെട്രോൾ എഞ്ചിൻ തന്നെയാണ് പുതിയ എലിവേറ്റിലും പ്രവർത്തിക്കുന്നത്. ഈ എഞ്ചിൻ 121 ബിഎച്ച്പി കരുത്തും 145 എൻഎം ടോർക്കും ഉത്പാദിപ്പിക്കാൻ ശേഷിയുള്ളതാണ്. ഉപഭോക്താക്കൾക്ക് തങ്ങളുടെ താൽപ്പര്യത്തിനനുസരിച്ച് തിരഞ്ഞെടുക്കാനായി 6 സ്പീഡ് മാനുവൽ, 7 സ്പീഡ് സിവിടി ഓട്ടോമാറ്റിക് ഗിയർബോക്സ് ഓപ്ഷനുകളും കമ്പനി നൽകുന്നുണ്ട്.
വിപണിയിലെ മത്സരവും വിലയും
ഫെയ്‌സ്‌ലിഫ്റ്റ് പതിപ്പായതിനാൽ നിലവിലെ മോഡലിനെ അപേക്ഷിച്ച് ചെറിയ തോതിൽ വില വർധനയുണ്ടാകാൻ സാധ്യതയുണ്ട്. നിലവിൽ 11.81 ലക്ഷം രൂപ മുതൽ 16.36 ലക്ഷം രൂപ വരെയാണ് എലിവേറ്റിന്റെ എക്സ്-ഷോറൂം വില വരുന്നത്. വിപണിയിലെത്തുമ്പോൾ മാരുതി സുസുക്കി വിക്ടോറിസ്, ഹ്യുണ്ടായി ക്രെറ്റ, കിയ സെൽറ്റോസ്, ഫോക്സ്‌വാഗൺ ടൈഗൺ, ടാറ്റ സിയറ, സ്കോഡ കുഷാക്ക്, റെനോൾട്ട് ഡസ്റ്റർ തുടങ്ങിയ ശക്തരായ മിഡ്‌സൈസ് എസ്‌യുവികളോടായിരിക്കും പുതിയ ഹോണ്ട എലിവേറ്റ് മത്സരിക്കുന്നത്. ഒക്ടോബർ 6ന് നടക്കുന്ന ഔദ്യോഗിക ലോഞ്ചിലൂടെ വാഹനത്തിന്റെ കൃത്യമായ വില വിവരങ്ങൾ പുറത്തുവരും.
