രാജ്യം ഉറ്റുനോക്കുന്ന പശ്ചിമ ബംഗാൾ നിയമസഭാ തിരഞ്ഞെടുപ്പിൽ ഭരണകക്ഷിയായ തൃണമൂൽ കോൺഗ്രസിനെ ഞെട്ടിച്ചുകൊണ്ട് ബിജെപിയുടെ വൻ മുന്നേറ്റം. ആദ്യഘട്ട ഫലസൂചനകൾ പുറത്തുവരുമ്പോൾ തൃണമൂലിനെ പിന്നിലാക്കി ബിജെപി ലീഡ് ഉയർത്തുകയാണ്. ഏറ്റവും ഒടുവിലെ വിവരം പ്രകാരം 124 സീറ്റുകളിൽ ബിജെപി മുന്നിട്ടുനിൽക്കുമ്പോൾ മുഖ്യമന്ത്രി മമതാ ബാനർജിയുടെ തൃണമൂൽ കോൺഗ്രസ് 110 സീറ്റുകളിലാണ് ലീഡ് ചെയ്യുന്നത്. കോൺഗ്രസിനും ഇടതുപക്ഷത്തിനും ഓരോ സീറ്റുകളിൽ മാത്രമാണ് നിലവിൽ മുന്നേറ്റമുണ്ടാക്കാൻ സാധിച്ചിട്ടുള്ളത്.
സംസ്ഥാനത്തെ ഏറ്റവും വലിയ പോരാട്ടം നടക്കുന്ന ഭവാനിപ്പൂരിൽ മുഖ്യമന്ത്രി മമതാ ബാനർജി പിന്നിലായതാണ് തൃണമൂൽ ക്യാമ്പിനെ ആശങ്കയിലാക്കുന്നത്. ബിജെപിയുടെ കരുത്തുറ്റ സ്ഥാനാർത്ഥിയും പ്രതിപക്ഷ നേതാവുമായ സുവേന്ദു അധികാരിയാണ് മമതയെ പിന്നിലാക്കി ഭവാനിപ്പൂരിൽ ലീഡ് ചെയ്യുന്നത്. നന്ദിഗ്രാമിലെ പോരാട്ടത്തിന് ശേഷം സുവേന്ദുവും മമതയും നേർക്കുനേർ വന്ന മണ്ഡലം എന്ന നിലയിൽ ഭവാനിപ്പൂരിലെ ഓരോ വോട്ടും നിർണ്ണായകമാണ്. 293 സീറ്റുകളുള്ള ബംഗാളിൽ കേവല ഭൂരിപക്ഷത്തിന് വേണ്ട 147 സീറ്റുകളിലേക്ക് ബിജെപി എത്തുമോ എന്നാണ് ഇപ്പോൾ ഏവരും നോക്കുന്നത്.
നിലവിൽ 245 സീറ്റുകളിലെ ട്രെൻഡുകളാണ് ലഭ്യമായിട്ടുള്ളത്. എക്സിറ്റ് പോൾ പ്രവചനങ്ങൾ ശരിവെക്കുന്ന രീതിയിലാണ് ബിജെപിയുടെ കുതിപ്പ്. വർഷങ്ങളായി തൃണമൂൽ ഭരിക്കുന്ന ബംഗാളിൽ ഇത്തവണ ഭരണം പിടിക്കാനായാൽ അത് ദേശീയ തലത്തിൽ ബിജെപിക്ക് വലിയ കരുത്തായി മാറും. സുവേന്ദു അധികാരിയുടെ ലീഡ് മമതാ ബാനർജിക്ക് കനത്ത തിരിച്ചടിയാകുമോ അതോ വരും റൗണ്ടുകളിൽ ദീദി കരുത്ത് തെളിയിക്കുമോ എന്നറിയാനുള്ള ആകാംക്ഷയിലാണ് രാഷ്ട്രീയ കേന്ദ്രങ്ങൾ.
