അസിഡിറ്റിയും നെഞ്ചെരിച്ചിലും വലയ്ക്കുന്നുവോ? ആശ്വാസമേകാൻ അടുക്കളയിലെ ഈ ആറ് ദിവ്യൗഷധങ്ങൾ

നമ്മുടെ തെറ്റായ ജീവിതശൈലിയും ഭക്ഷണരീതികളും കാരണം ഇന്ന് ഭൂരിഭാഗം ആളുകളും നേരിടുന്ന പ്രധാന ആരോഗ്യപ്രശ്നങ്ങളിലൊന്നാണ് അസിഡിറ്റി. ആമാശയത്തിൽ ആസിഡ് അമിതമായി ഉത്പാദിപ്പിക്കപ്പെടുന്നത് മൂലമുണ്ടാകുന്ന ഈ അവസ്ഥ നെഞ്ചെരിച്ചിൽ, പുളിച്ചുതികട്ടൽ, വയറുവീർക്കൽ, ദഹനക്കേട് എന്നിവയിലേക്ക് വഴിതെളിക്കുന്നു. അമിതമായി എരിവും കൊഴുപ്പും അടങ്ങിയ ഭക്ഷണങ്ങൾ കഴിക്കുന്നത്, കഫീൻ, മദ്യം, അമിതമായ മാനസിക സമ്മർദ്ദം, ഭക്ഷണം കഴിച്ചയുടൻ കിടന്നുറങ്ങുന്ന ശീലം എന്നിവയെല്ലാം അസിഡിറ്റിയുടെ ആഘാതം കൂട്ടുന്ന ഘടകങ്ങളാണ്. എന്നാൽ നിത്യജീവിതത്തിൽ നാം കഴിക്കുന്ന ചില സ്വാഭാവിക ഭക്ഷണങ്ങളിലൂടെ അസിഡിറ്റിയെ പൂർണ്ണമായും നിയന്ത്രിച്ചു നിർത്താൻ സാധിക്കും. വയറിന് ആശ്വാസം നൽകാനും ദഹനം സുഗമമാക്കാനും സഹായിക്കുന്ന ആറ് പ്രധാന ഭക്ഷണങ്ങളെക്കുറിച്ച് വിശദമായി അറിയാം.

അടുക്കളയിലെ അവശ്യവസ്തുവായ ഇഞ്ചി വയറിന് തണുപ്പും ആശ്വാസവും നൽകാൻ ഏറ്റവും മികച്ചതാണ്. ഇഞ്ചിയിൽ അടങ്ങിയിരിക്കുന്ന ‘ജിഞ്ചറോൾ’ എന്ന സജീവ ഘടകത്തിന് ശരീരത്തിലെ വീക്കവും നീർക്കെട്ടും കുറയ്ക്കാനുള്ള പ്രത്യേക ശേഷിയുണ്ട്. ഇത് ആമാശയത്തിലെ ദഹനപ്രക്രിയയെ വേഗത്തിലാക്കുകയും ആസിഡ് മുകളിലേക്ക് തികട്ടി വരുന്നത് തടയുകയും ചെയ്യുന്നു. ദിവസവും രാവിലെ ഒരു ഗ്ലാസ് ഇഞ്ചി ചായ കുടിക്കുന്നത് ദഹനവ്യവസ്ഥയെ ഉത്തേജിപ്പിക്കാനും ദിവസം മുഴുവൻ അസിഡിറ്റി തടയാനും സഹായിക്കും.

പ്രകൃതിദത്ത പ്രോബയോട്ടിക് ഗുണങ്ങളാൽ സമ്പന്നമായ മോര് അസിഡിറ്റിക്ക് ഉടനടി ആശ്വാസം നൽകുന്ന ഒന്നാണ്. മോരിൽ ധാരാളമായി അടങ്ങിയിരിക്കുന്ന ലാക്റ്റിക് ആസിഡ് വയറ്റിലെ അമിതമായ ആസിഡ് അളവിനെ പ്രകൃതിദത്തമായി ക്രമീകരിക്കാൻ സഹായിക്കുന്നു. ദഹന എൻസൈമുകളുടെ പ്രവർത്തനം കൂടുതൽ മെച്ചപ്പെടുത്തുന്നതിനായി ഒരു ഗ്ലാസ് മോരിൽ അല്പം വറുത്തുപൊടിച്ച ജീരകം കൂടി ചേർത്ത് കഴിക്കുന്നത് അസിഡിറ്റിയും വയറെരിച്ചിലും പെട്ടെന്ന് മാറാൻ വളരെ ഗുണകരമാണ്.

ഭക്ഷണം കഴിച്ചതിനുശേഷം പെരുംജീരകം ചവച്ചരച്ച് കഴിക്കുന്നത് തികച്ചും ആരോഗ്യകരമായ ഒരു ശീലമാണ്. വയറുനിറയെ ഭക്ഷണം കഴിച്ച ശേഷം അര ടീസ്പൂൺ പെരുംജീരകം കഴിക്കുമ്പോൾ അതിൽ നിന്ന് ‘അനെത്തോൾ’ എന്ന ഘടകം പുറത്തുവരുന്നു. ഇത് വയറ്റിലെ പേശികൾക്ക് അയവ് വരുത്തുകയും വയറുവീർക്കൽ കുറച്ച് ആസിഡ് റിഫ്ലക്സ് തടയുകയും ചെയ്യുന്നു. കൂടാതെ ചതച്ച പെരുംജീരകം ചൂടുവെള്ളത്തിലിട്ട് പെരുംജീരക ചായയായും കുടിക്കാവുന്നതാണ്. ഇത് ദഹനം മെച്ചപ്പെടുത്തുന്നതിനൊപ്പം വായയിലെ ദുർഗന്ധം അകറ്റി ഉന്മേഷം നൽകുകയും ചെയ്യും.

ശരീരത്തിൽ ആവശ്യത്തിന് ജലാംശം നിലനിർത്താൻ കരിക്കിൻ വെള്ളത്തേക്കാൾ മികച്ചറ്റൊരു പാനീയമില്ല. ദഹനവ്യവസ്ഥയ്ക്ക് പെട്ടെന്ന് തണുപ്പ് നൽകാൻ കരിക്കിൻ വെള്ളത്തിന് പ്രത്യേക കഴിവുണ്ട്. ഇതിൽ അടങ്ങിയിരിക്കുന്ന പ്രകൃതിദത്ത ഇലക്ട്രോലൈറ്റുകൾ ശരീരത്തിലെയും ആമാശയത്തിലെയും pH നില സന്തുലിതമായി നിലനിർത്താൻ സഹായിക്കുന്നു. ഇത് ദാഹം ശമിപ്പിക്കുക മാത്രമല്ല, അസിഡിറ്റി കുറച്ച് മൊത്തത്തിലുള്ള ദഹനാരോഗ്യം വർദ്ധിപ്പിക്കുകയും ചെയ്യുന്നു.

ഭക്ഷണശേഷം വയർ വീർത്തതുപോലെയോ കനത്ത ഭാരമുള്ളതായോ അനുഭവപ്പെടുകയാണെങ്കിൽ അയമോദകം മികച്ചൊരു പരിഹാരമാണ്. അര ടീസ്പൂൺ അയമോദകം എടുത്ത് ഒരു ഗ്ലാസ് ഇളം ചൂടുവെള്ളത്തോടൊപ്പം നന്നായി ചവച്ചരച്ച് കഴിക്കുന്നത് ആശ്വാസം നൽകും. അയമോദകത്തിൽ അടങ്ങിയിരിക്കുന്ന ‘തൈമോൾ’ എന്ന ഘടകം ദഹനത്തിന് ആവശ്യമായ ഗ്യാസ്ട്രിക് നീരുകളുടെ ഉൽപ്പാദനം ത്വരിതപ്പെടുത്തുകയും വയറ്റിലെ ഗ്യാസും അസ്വസ്ഥതകളും പെട്ടെന്ന് ഇല്ലാതാക്കുകയും ചെയ്യുന്നു.