തിരുവനന്തപുരം: കേരളത്തിൽ തെരഞ്ഞെടുപ്പ് ആവേശം കൊടുമുടി കയറ്റി ദേശീയ രാഷ്ട്രീയത്തിലെ അതികായന്മാർ ഇന്ന് വീണ്ടും സംസ്ഥാനത്തെത്തുന്നു. എൻ.ഡി.എ സ്ഥാനാർത്ഥികളുടെ പ്രചാരണത്തിന് കരുത്തുപകരാൻ പ്രധാനമന്ത്രി നരേന്ദ്ര മോദിയും, യു.ഡി.എഫിനായി രാഹുൽ ഗാന്ധിയും ഇന്ന് ഒരേസമയം കേരളത്തിൽ വിവിധയിടങ്ങളിൽ ജനങ്ങളെ അഭിസംബോധന ചെയ്യും.
വൈകുന്നേരം അഞ്ച് മണിയോടെയാണ് തിരുവനന്തപുരം നഗരത്തെ ആവേശത്തിലാഴ്ത്തി പ്രധാനമന്ത്രിയുടെ റോഡ് ഷോ നടക്കുന്നത്. കിള്ളിപ്പാലം മുതൽ കരമന വരെ നീളുന്ന റോഡ് ഷോയിൽ ആയിരക്കണക്കിന് പ്രവർത്തകർ അണിനിരക്കുമെന്നാണ് പ്രതീക്ഷിക്കുന്നത്. ഇതിനുപുറമെ തിരുവല്ലയിൽ നടക്കുന്ന പൊതുസമ്മേളനത്തിലും പ്രധാനമന്ത്രി പങ്കെടുക്കുന്നുണ്ട്. ശബരിമല സ്വർണ്ണക്കൊള്ളയുമായി ബന്ധപ്പെട്ട ആരോപണങ്ങൾ, എഫ്.സി.ആർ.എ നിയമഭേദഗതി വിവാദം തുടങ്ങിയ വിഷയങ്ങളിൽ പ്രധാനമന്ത്രി നടത്തുന്ന പ്രതികരണങ്ങൾ കേരള രാഷ്ട്രീയത്തിൽ ഏറെ നിർണ്ണായകമാകും.
മറുഭാഗത്ത്, കോൺഗ്രസ് നായകൻ രാഹുൽ ഗാന്ധിയും ഇന്ന് സംസ്ഥാനത്ത് സജീവമാണ്. മൂന്ന് ജില്ലകളിലായി സംഘടിപ്പിക്കുന്ന നാല് പ്രധാന പരിപാടികളിലാണ് അദ്ദേഹം പങ്കെടുക്കുന്നത്. രാവിലെ പത്ത് മണിയോടെ കൊച്ചിയിലെത്തുന്ന രാഹുൽ ഗാന്ധി, ആദ്യം ആലപ്പുഴയിലെ പൊതുസമ്മേളനത്തെയാകും അഭിസംബോധന ചെയ്യുക. പ്രമുഖ മുന്നണികളുടെ രണ്ട് ദേശീയ നേതാക്കൾ ഒരേസമയം കേരളത്തിൽ എത്തുന്നതോടെ സംസ്ഥാനത്തെ തെരഞ്ഞെടുപ്പ് ചിത്രം കൂടുതൽ വാശിയേറിയതായി മാറിയിരിക്കുകയാണ്.
