പശ്ചിമേഷ്യയിൽ ശക്തിപ്രാപിക്കുന്ന ഇറാൻ യുദ്ധത്തിന്റെ ആഘാതം ഇന്ത്യയിലേക്കും എത്തിത്തുടങ്ങി. ഗൾഫ് മേഖലയിൽ നിന്നുള്ള ഇന്ധന ഗതാഗതത്തിന് നിർണായകമായ ഹോർമുസ് കടലിടുക്കിൽ സംഘർഷ ഭീഷണി ഉയർന്നതോടെ ഇന്ത്യയിൽ എൽപിജി ഉൾപ്പെടെയുള്ള ഇന്ധന വിതരണത്തെ ബാധിക്കുമെന്ന ആശങ്ക ശക്തമാകുകയാണ്. ലോകത്തിലെ ഏറ്റവും വലിയ എൽപിജി ഇറക്കുമതി രാജ്യങ്ങളിൽ ഒന്നായ ഇന്ത്യയ്ക്ക് ഉപഭോഗത്തിനാവശ്യമായ പാചകവാതകത്തിന്റെ വലിയ പങ്കും ഗൾഫ് രാജ്യങ്ങളിൽ നിന്നാണ് എത്തുന്നത്. ഈ വിതരണ ശൃംഖല തടസ്സപ്പെടാനുള്ള സാധ്യതയാണ് നിലവിൽ ഉയരുന്നത്.
ഇന്ത്യയിൽ നിലവിലുള്ള എൽപിജി സ്റ്റോക്ക് ഏകദേശം ഒരു മാസം മാത്രം മതിയാകുമെന്നാണ് വിവിധ വിലയിരുത്തലുകൾ. അതിനിടെ ഖത്തറിൽ നിന്നുള്ള എൽഎൻജി കയറ്റുമതിയിലും തടസ്സങ്ങൾ ഉണ്ടായെന്ന റിപ്പോർട്ടുകൾ പുറത്തുവന്നതോടെ ഊർജ്ജ മേഖലയിൽ ആശങ്ക വർധിച്ചിട്ടുണ്ട്. ചില ഗ്യാസ് വിതരണ കമ്പനികൾ ഉപഭോക്താക്കൾക്ക് വിതരണം നിയന്ത്രിക്കേണ്ട സാഹചര്യം ഉണ്ടാകാമെന്ന സൂചനകളും ഉയർന്നിട്ടുണ്ട്.
ഇന്ധന ക്ഷാമത്തെക്കുറിച്ചുള്ള അഭ്യൂഹങ്ങൾ ചില സംസ്ഥാനങ്ങളിൽ പാനിക് ബയിംഗിന് വഴിവച്ചിരിക്കുകയാണ്. മഹാരാഷ്ട്രയിലും കർണാടകയിലെ ചില പ്രദേശങ്ങളിലും പെട്രോൾ പമ്പുകളിൽ വാഹനങ്ങളുടെ നീണ്ട നിരകൾ രൂപപ്പെട്ടതായി റിപ്പോർട്ടുകൾ പറയുന്നു. സാമൂഹിക മാധ്യമങ്ങളിലൂടെ പ്രചരിച്ച വിവരങ്ങളാണ് പല സ്ഥലങ്ങളിലും ജനങ്ങൾ ഇന്ധനം സംഭരിക്കാൻ തിരക്കുകൂട്ടാൻ കാരണമായതെന്ന് അധികൃതർ വ്യക്തമാക്കി.
അതേസമയം രാജ്യത്ത് ഉടൻ വലിയ ഇന്ധന ക്ഷാമമുണ്ടാകില്ലെന്നാണ് കേന്ദ്ര സർക്കാർ ഉൾപ്പെടെയുള്ള ബന്ധപ്പെട്ട ഏജൻസികളുടെ വിലയിരുത്തൽ. ഏകദേശം 20 മുതൽ 25 ദിവസം വരെ മതിയാകുന്ന ക്രൂഡ് ഓയിൽ സ്റ്റോക്ക് രാജ്യത്തിനുണ്ടെന്നും ഗൾഫിന് പുറത്തുള്ള മറ്റ് രാജ്യങ്ങളിൽ നിന്ന് കൂടുതൽ ഇന്ധനം ഇറക്കുമതി ചെയ്യാനുള്ള ശ്രമങ്ങൾ ആരംഭിച്ചിട്ടുണ്ടെന്നും അധികൃതർ അറിയിച്ചു.
എന്നാൽ പശ്ചിമേഷ്യയിലെ സംഘർഷം നീണ്ടുനിൽക്കുകയാണെങ്കിൽ അതിന്റെ ആഘാതം ഇന്ത്യയിലെ സാധാരണ കുടുംബങ്ങളുടെ അടുക്കളകളിലേക്കും എത്താനിടയുണ്ടെന്നാണ് വിദഗ്ധരുടെ മുന്നറിയിപ്പ്. ക്രൂഡ് ഓയിൽ വില കുത്തനെ ഉയർന്നാൽ എൽപിജി ഉൾപ്പെടെയുള്ള ഇന്ധനങ്ങളുടെ വിലയും ഉയരാൻ സാധ്യതയുണ്ടെന്നും അതിന്റെ പ്രതിഫലം രാജ്യത്തെ ജീവിതച്ചെലവിൽ പ്രകടമാകുമെന്നും സാമ്പത്തിക വിദഗ്ധർ ചൂണ്ടിക്കാട്ടുന്നു.
