നമ്മുടെ ദൈനംദിന ഭക്ഷണക്രമത്തിൽ പച്ചക്കറികൾക്കും ഇലക്കറികൾക്കും കൃത്യമായ സ്ഥാനം നൽകേണ്ടത് ആരോഗ്യ സംരക്ഷണത്തിന് അത്യന്താപേക്ഷിതമാണ്. ഫാസ്റ്റ് ഫുഡുകളിലേക്കും കൃത്രിമ ഭക്ഷണങ്ങളിലേക്കും മലയാളി മാറുമ്പോൾ, പ്രകൃതിദത്തമായ പച്ചക്കറികളുടെ പ്രാധാന്യം പലപ്പോഴും വിസ്മരിക്കപ്പെടുന്നു. എന്നാൽ ശരീരത്തിന് ആവശ്യമായ വൈറ്റമിനുകൾ, ധാതുക്കൾ, ആന്റിഓക്സിഡന്റുകൾ, നാരുകൾ എന്നിവയുടെ കലവറയാണ് പച്ചനിറത്തിലുള്ള ഭക്ഷണങ്ങൾ.
ദിവസേനയുള്ള ഭക്ഷണത്തിൽ ചീര, മുരിങ്ങയില, ബ്രോക്കോളി, പയറില തുടങ്ങിയവ ഉൾപ്പെടുത്തുന്നത് വഴി ശരീരത്തിന്റെ പ്രതിരോധശേഷി ഗണ്യമായി വർദ്ധിക്കും. ഇവയിൽ അടങ്ങിയിരിക്കുന്ന വൈറ്റമിൻ സി, എ എന്നിവ പകര്ച്ചവ്യാധികളില് നിന്നും വൈറല് പനികളില് നിന്നും ശരീരത്തെ സംരക്ഷിക്കുന്നു. കൂടാതെ, ഇലക്കറികളിലുള്ള ഉയർന്ന അളവിലുള്ള ഇരുമ്പിന്റെ (അയൺ) അംശം രക്തത്തിലെ ഹീമോഗ്ലോബിൻ ഉത്പാദനം കൂട്ടി വിളർച്ച തടയാൻ സഹായിക്കും.
ജീവിതശൈലീ രോഗങ്ങളെ അകറ്റി നിർത്താൻ പച്ചക്കറികൾക്ക് പ്രത്യേക കഴിവുണ്ട്. കരളിൽ കൊഴുപ്പ് അടിഞ്ഞുകൂടുന്നത് തടഞ്ഞ് ഫാറ്റി ലിവർ സാധ്യത കുറയ്ക്കാനും ഉയർന്ന രക്തസമ്മർദ്ദം, പ്രമേഹം എന്നിവ നിയന്ത്രിക്കാനും ദിവസവും ഒരു നേരം ഇലക്കറികൾ കഴിക്കുന്നത് ഉത്തമമാണ്. ഇവയിൽ കലോറി വളരെ കുറവായതിനാലും നാരുകൾ ധാരാളം അടങ്ങിയിട്ടുള്ളതിനാലും ശരീരഭാരം കുറയ്ക്കാൻ ആഗ്രഹിക്കുന്നവർക്ക് ഏറ്റവും അനുയോജ്യമായ ഭക്ഷണമാണിത്.
കാഴ്ചശക്തി വർദ്ധിപ്പിക്കുന്നതിനും കണ്ണുകളെ ബാധിക്കുന്ന ഗുരുതരമായ ഗ്ലൂക്കോമ, തിമിരം പോലുള്ള രോഗങ്ങൾ തടയുന്നതിനും ഇലക്കറികളിലെ ഘടകങ്ങൾ സഹായിക്കുന്നു. അതോടൊപ്പം തലച്ചോറിന്റെ ആരോഗ്യം നിലനിർത്താനും മറവിരോഗത്തെ ഒരു പരിധി വരെ പ്രതിരോധിക്കാനും പച്ചക്കറികൾക്ക് സാധിക്കുമെന്ന് പഠനങ്ങൾ വ്യക്തമാക്കുന്നു. അതിനാൽ കൃത്രിമ രുചികൾക്ക് പിന്നാലെ പോകാതെ, ആരോഗ്യകരമായ നാളേക്ക് വേണ്ടി നമ്മുടെ നിത്യേനയുള്ള ആഹാരത്തിൽ പച്ചക്കറികളും തനത് ഇലക്കറികളും നിർബന്ധമായും ഉൾപ്പെടുത്താൻ ശ്രദ്ധിക്കണം.
