കൊച്ചി: മാസങ്ങളോളം കേരള ക്രിക്കറ്റ് ലോകത്ത് ചർച്ചയായിരുന്ന ശ്രീശാന്ത്–കേരള ക്രിക്കറ്റ് അസോസിയേഷൻ (KCA) തർക്കത്തിന് ഒടുവിൽ വിരാമം. കെസിഎ ഭാരവാഹികൾക്കെതിരെ നടത്തിയ പരാമർശങ്ങളിൽ മുൻ ഇന്ത്യൻ താരം എസ്. ശ്രീശാന്ത് നിരുപാധികം മാപ്പപേക്ഷ നൽകിയതിനെ തുടർന്ന്, അദ്ദേഹത്തിന് ഏർപ്പെടുത്തിയിരുന്ന മൂന്ന് വർഷത്തെ വിലക്ക് കേരള ക്രിക്കറ്റ് അസോസിയേഷൻ പിൻവലിച്ചു.
പ്രത്യേക ജനറൽ ബോഡി യോഗത്തിലാണ് വിലക്ക് പിൻവലിക്കാനുള്ള തീരുമാനം ഐകകണ്ഠ്യേന കൈക്കൊണ്ടത്. ശ്രീശാന്തിന്റെ മാപ്പപേക്ഷ പരിഗണിച്ച ശേഷമാണ് അസോസിയേഷൻ ഈ തീരുമാനം സ്വീകരിച്ചത്.
എന്തായിരുന്നു വിവാദം?
മലയാളി താരം സഞ്ജു സാംസണുമായി ബന്ധപ്പെട്ട വിവാദങ്ങൾക്കിടെ കെസിഎ നേതൃത്വത്തിനെതിരെ ശ്രീശാന്ത് രൂക്ഷ വിമർശനം നടത്തിയിരുന്നു. സംഘടനയുടെ പ്രതിച്ഛായയ്ക്ക് മങ്ങലേൽപ്പിക്കുന്ന തരത്തിലുള്ള പ്രസ്താവനകളാണ് നടത്തിയതെന്ന വിലയിരുത്തലിനെ തുടർന്നാണ് കെസിഎ അദ്ദേഹത്തിന് മൂന്ന് വർഷത്തെ വിലക്ക് ഏർപ്പെടുത്തിയത്.
വിലക്കിനെതിരെ ശ്രീശാന്ത് നിയമനടപടികളും സ്വീകരിച്ചിരുന്നെങ്കിലും ഹർജി അനുകൂലമായില്ല. തുടർന്ന് കെസിഎയ്ക്ക് നിരുപാധികം ഖേദം പ്രകടിപ്പിച്ചുകൊണ്ട് മാപ്പപേക്ഷ സമർപ്പിക്കുകയായിരുന്നു.
വീണ്ടും ക്രിക്കറ്റിലേക്ക്
വിലക്ക് പിൻവലിച്ചതോടെ കേരള ക്രിക്കറ്റ് അസോസിയന്റെ പ്രവർത്തനങ്ങളുമായി ബന്ധപ്പെട്ട പരിപാടികളിൽ പങ്കെടുക്കുന്നതിനും കേരള ക്രിക്കറ്റ് ലീഗ് (KCL)ലെ എറിയസ് കൊല്ലം സയിലോർസ് ടീമിന്റെ സഹഉടമ എന്ന നിലയിൽ പ്രവർത്തിക്കുന്നതിനും ഇനി തടസ്സമുണ്ടാകില്ല.
അതേസമയം, ഭാവിയിൽ സംഘടനയുടെ അച്ചടക്കത്തിന് വിരുദ്ധമായോ അസോസിയേഷന്റെ പ്രതിച്ഛായയെ ബാധിക്കുന്ന തരത്തിലോ പെരുമാറുകയോ പ്രസ്താവനകൾ നടത്തുകയോ ചെയ്താൽ കർശന നടപടി സ്വീകരിക്കുമെന്ന് കെസിഎ മുന്നറിയിപ്പ് നൽകിയിട്ടുണ്ട്.
ഈ തീരുമാനത്തോടെ കേരള ക്രിക്കറ്റിലെ സമീപകാലത്തെ ഏറ്റവും ശ്രദ്ധേയമായ വിവാദങ്ങളിലൊന്നിന് താൽക്കാലികമായെങ്കിലും പര്യവസാനം കുറിച്ചിരിക്കുകയാണ്.
