ചിറയിൻകീഴ് അഴൂരിൽ പാമ്പുകടിയേറ്റ് എട്ടുവയസ്സുകാരൻ മരിച്ച ദൗർഭാഗ്യകരമായ സംഭവത്തിൽ ആശുപത്രി അധികൃതർക്കെതിരെ ഗുരുതര ആരോപണവുമായി കുടുംബം രംഗത്തെത്തി. അഴൂർ മൂലയിൽ വീട്ടിൽ ദിലീപ്-അനു ദമ്പതികളുടെ മകൻ ദിക്ഷലാണ് മരണപ്പെട്ടത്. പുലർച്ചെ രണ്ടരയോടെ ഉറക്കത്തിനിടെയാണ് കുട്ടിക്ക് പാമ്പുകടിയേറ്റത്. നാലുമണിയോടെ വിവരം അറിഞ്ഞ ഉടൻ തന്നെ കുട്ടിയെ ചിറയിൻകീഴ് താലൂക്ക് ആശുപത്രിയിൽ എത്തിച്ചെങ്കിലും അവിടെനിന്നും മതിയായ പരിഗണനയോ കൃത്യമായ ചികിത്സയോ ലഭിച്ചില്ലെന്ന് പിതാവ് ദിലീപ് ആരോപിക്കുന്നു.
ആശുപത്രിയിൽ എത്തുമ്പോൾ കുട്ടി സംസാരിച്ചിരുന്നുവെന്നും ശാരീരിക ബുദ്ധിമുട്ടുകൾ അറിയിച്ചിട്ടും ഡോക്ടർമാർ അത് നിസ്സാരമായാണ് കണ്ടതെന്നുമാണ് പിതാവിന്റെ പരാതി. പ്രാഥമിക ചികിത്സ നൽകിയ ശേഷം മെഡിക്കൽ കോളേജ് ആശുപത്രിയിലേക്ക് മാറ്റിയെങ്കിലും കുട്ടി മരണത്തിന് കീഴടങ്ങുകയായിരുന്നു. വീടിനുള്ളിൽ ഒളിച്ചിരുന്ന മൂർഖൻ പാമ്പാണ് കുട്ടിയെ കടിച്ചതെന്ന് പിന്നീട് വ്യക്തമായി. ഈ പാമ്പിനെ വനംവകുപ്പിന്റെ സഹായത്തോടെ പിടികൂടിയിട്ടുണ്ട്. കുട്ടിയുടെ മൃതദേഹം നിലവിൽ തിരുവനന്തപുരം മെഡിക്കൽ കോളേജ് ആശുപത്രിയിൽ സൂക്ഷിച്ചിരിക്കുകയാണ്. ഒരു പിഞ്ചുജീവൻ നഷ്ടമായതിൽ ആശുപത്രി അധികൃതരുടെ ഭാഗത്തുനിന്നുണ്ടായ അനാസ്ഥ അന്വേഷിക്കണമെന്ന ആവശ്യത്തിൽ ഉറച്ചുനിൽക്കുകയാണ് ബന്ധുക്കൾ.
